Z GPS-nastrojom sej serbscy olympiadnicy swoju lětušu rěčnu temu wotkryli

Wodowe Hendrichecy (SN/MiP). Dźensa připołdnju zakónči so 55. olympiada serbskeje rěče we Wodowych Hendrichecach. Serbske šulske towarstwo (SŠT), kotrež zarjadowanje zhromadnje z Rěčnym centrumom WITAJ přihotuje a přewjedźe, witaše lětsa nimo 63 šulerjow šesteho lětnika z Hornjeje Łužicy tež zaso 11 šulerjow z Delnjeje Łužicy. Loni wšak so delnjoserbske dźěći z Braniborskeje tamnišich korona-postajenjow dla wobdźělić móhli njejsu.

Srjedu je Mathias Peter, nawoda Budyskeje wotnožki krajneho zarjada za šulu a kubłanje, zarjadowanje oficialne zahajił. Po tym je team wučerjow olympiady šulerki a šulerjow do skupinow rozrjadował. Wone su po rěčnym stawje a po šulach měšane. Kaž hižo w zańdźenych lětach, přewodźuja olympiadnikow tež lětsa zaso serbscy studenća wučerstwa.