Dopóznaća europskeho zetkanja w Sedmihródskej za kubłanje we Łužicy

Sibiu (SN/mb). Hesło „šula w maćeršćinje njeje luksus, ale prosće trěbnosć“ steji jako citat nad lětušim wuradźowanjom dźěłoweho zjednoćenstwa „kubłanje“ Federalistiskeje unije europskich narodnosćow (FUEN). Prajił je to Benjamin Józsa, jednaćel Demokratiskeho foruma Němcow w Rumunskej, hosćićela zetkanja. Wot wutory hač do dźensnišeho su so zastupjerjo narodnych mjeńšin w Sedmihródskej w Rumunskej schadźowali, mjez nimi ze stron Serbow Katrin Suchec-Dźisławkowa, kubłanska referentka Domowiny a kopředsydka staršiskeje iniciatiwy z Radworja, a Andreas Ošika, jednaćel Serbskeho šulskeho towarstwa (SŠT). Wobdźěliło je so wšo dohromady 20 ludźi z 12 krajow. „Špihelowa žurla“ domu foruma Němcow w Rumunskej běše z wjelorakosću rěčow napjelnjena.