RCW přihotuje rjad nowych serbskich wučbnicow

Budyšin (SN/MiR). Rěčny centrum WITAJ (RCW) a Ludowe nakładnistwo Domowina chcetej lětsa w cyłku 33 titulow za wučbu na šulach w Hornjej a Delnjej Łužicy wudać. To su nowowudaća runje tak kaž nowonakłady hižo předležacych wučbnych materialijow. „Na wutrobje leži nam přeco material za wučbu serbšćiny, a to za wšitke rěčne skupiny, za maćernorěčnych a za 2plus-šulerjow a tež za tych, kotřiž serbšćinu jako cuzu rěč wuknu“, rjekny wotrjadnica RCW za rěčne wuwiwanje/pedagogiku Annett Dźědźikowa.