Praktikantka w redakciji Serbskich Nowin Marta Měrćinkec rozprawja

Budyšin (SN/MaM). Na wšelakich gymnazijach Budyskeho wokrjesa móža sej šulerjo 9. lětnika wokomiknje w šulerskim praktikumje powołanski swět wotkryć. Za to skontaktuje kóždy šuler indiwiduelnje zarjadnišćo, w kotrymž chce rady dwaj tydźenjej přebywać a nadawki kaž tež wšědny dźeń wěsteho powołanja dožiwić. Kak zajimawy pak tajki praktikum woprawdźe je a kajke móžnosće so ći skića? Hladajo na to su rozdźěle mjez praktikumowymi městnami wězo wulke. Tohodla je wuměna z tamnymi praktikantami ćim zajimawša.