15. swjedźeń serbskeje rěče RCW za dźěći w Stróži přewjedli
Stróža (SN/MiR). Dohromady 157 dźěći je wčera w Domje tysac hatow w Stróži a w tamnišim šulskim muzeju přebyło. Šulerjo 3. a 4. lětnika wuknu w Bošecach, Hućinje, Nowej Wsy, Kulowje a Slepom kaž tež we Wulkich Zdźarach, Wulkej Dubrawje a Wojerecach serbšćinu jako cuzu rěč. Ze šulow su skupiny dwanaće do 27 šulerjow do Stróže přijěli, štož je logistiske wužadanje.
Budyski Rěčny centrum WITAJ (RCW) je zetkanje wospjet organizował. Zarjadowanje je za serbšćinu wuknjacych wuznamjenjenje. Wjetšina tutych šulerjow serbšćinu zwonka šulskeje wučby njesłyši. Na swjedźenju so jim wuwědomi, kelko dalšich dźěći nimo nich serbšćinu wuknje. A za wučerki je to dobra składnosć, sej nazhonjenja nastupajo posrědkowanje serbšćiny wuměnić. Dźěći su w měšanych skupinach wuknyli a so zabawjeli. W kóždej skupinje běchu šulerjo z rozdźělnych šulow.
