78 dźěći so tuchwilu we Wodowych Hendrichecach wubědźuje
Wodowe Hendrichecy. (SN/VaŽ). Wot soboty je prózdninske lěhwo Querxenland we Wodowych Hendrichecach městnosć za wosebity prózdninski tydźeń: 78 dźěći 4. do 8. lětnika dožiwja tu napjate dny połne kreatiwity a wjesela w duchu zhromadnosće. Šěsć hladarjow skupinu přewodźa: nawodnica lěhwa Marlis Młynkowa, Mila Dźisławkec, Celina Knopec, Silvana Gruberowa, Jan Špitank a Fabian Čěsla staraja so wo to, zo dźěćom ničo njepobrachuje.
K zazběhej mějachu słónčne wjedro, a z tym idealne wuměnjenja za aktiwity pod hołym njebjom. Dźěći su so do dźewjeć mustwow rozdźělili a jako tajke nětko wšědnje při małych wubědźowanjach, tak mjenowanych challenges, přećiwo sebi nastupuja a dypki sebi nahromadźa. Při tym dźe mjez druhim wo jejkowy běh, sprint na čas, twar pyramidow abo choreografiske skupinske zwučowanja. Tež lěsny běh je dźěl programa a žada sej wot młodych wobdźělnikow wutrajnosć.