Rěčny niwow pochada dźěći dla rozdźělny

Budyšin/Kamjenica (SN/MiR). Po informacijach Clemensa Arndta, rěčnika ­sakskeho Krajneho zarjada za kubłanje a šule (LaSuB) w Kamjenicy, wuknje w 5. lětniku w serbskich a serbšćinu wuwučowacych šulach aktualnje 226 šulerjow a šulerkow po koncepće 2 plus. Na wyšich šulach je jich 161 holcow a hólcow w cyłkownje dźesać rjadownjach, kotřiž serbšćinu w rěčnym předmjeće wuknu a tež w fachowej wučbje nałožuja. Na Budyskim Serbskim gymnaziju wuwučuja w třoch rjadownjach 5. lětnika w cyłku 65 šulerjow a šulerkow. Tam wuknu wšitcy šulerjo serbšćinu po koncepće 2plus.

Přirunaš-li ličby LaSuB a informacije ze serbskich wyšich šulow, jewi so diskrepanca. Tak su so ličby na třoch šulach minimalnje zwyšili, tak zo mamy na wyšich šulach wo pjeć šulerjow wjace w 5. lětniku. Přičina toho je, zo móža starši swoje dźěći hišće hač do zahajenja noweho šulskeho lěta, haj, w Sakskej samo hač po nazymskich prózdninach na kubłanišćach přizjewić.