Referendarojo, nowi wučerjo, praktikanća a asistenća su rědcy
Budyšin (SN/MiR). Ličba referendarow na serbskich a serbšćinu wuwučowacych šulach je snadna. Kaž rěčnik Krajneho zarjada za šulu a kubłanje (LaSuB) w Kamjenicy Clemens Arndt zdźěli, skutkuja na serbskich wyšich šulach a gymnaziju tuchwilu w cyłku třo referendarojo. Zdobom su někotrych nowych wučerjow přistajili.
René Wjacławk, nawoda Budyskeho Serbskeho gymnazija zdźěli na naprašowanje SN: „Ze spočatkom šulskeho lěta 2025/2026 wukubłamy referendarku Bianku Rachelic w předmjetomaj serbšćina a jendźelšćina.“ Z tutym lětom dźěłataj na gymnaziju nowaj kolegaj, kotrajž wuwučujetaj předmjetaj němčinu a wuměłske kubłanje resp. serbšćinu a sport. Praktikantow abo šulskich asistentow na gymnaziju tuchwilu nimaja.
