Budyšin (SN/mb). Hač do 25 procentow mjenje dźěći na zakładnych šulach w Sakskej – z tutej ličbu je kultusowy minister Conrad Clemens (CDU) „najzrudnišu statistiku Sakskeje“ připowědźił, wo kotrejž su wčera tež Serbske Nowiny rozprawjeli. Što pak spad porodow a wotpowědna prognoza přichodnych ličbow šulerjow za serbsku Łužicu woznamjenjatej? To chcychmy wot Kathariny Jurkoweje zhonić, předsydki Serbskeho šulskeho towarstwa (SŠT).

Haj wšak, lětušemu wulkemu 1. lětnikej na serbskich šulach budu mjeńše sćěhować, to je wotwidźeć. Tež w pěstowarnjach w nošerstwje SŠT je dale a mjenje přizjewjenjow. Najebać to njeje pak spad tajki nahły kaž w metropolach, serbske swójby maja wjac dźěći hač w sakskim přerězku. Za přichod ma SŠT jasny zaměr: wšě stejnišća serbskich šulow zachować. W přichodźe móhła samo lětniki přesahowaca wučba jedna opcija być. To pak njeje zlě, na te wašnje druhe mjeńšiny kaž Frizojo hižo dawno z wuspěchom wuwučuja, kaž su serbscy pedagogojo wot swojich partnerow zhonili.