Štyri serbske zakładne šule trjebaja nowe nawodnistwo

Ralbicy/Wojerecy (SN/MiR). Na štyrjoch serbskich zakładnych šulach maja wot přichodneho šulskeho lěta nowi šulscy nawodźa resp. nowe šulske nawodnicy skutkować. Nawodnicy Wojerowskeje šule „Handrij Zejler“, Petra Schenkowa, a Ralbičanskeje zakładneje šule, Andrea Liehnowa, póńdźetej kónc tohole šulskeho lěta na wuměnk. Runje tak je na Budyskej Serbskej zakładnej šuli. Tamniša amtěrowaca nawodnica Andrea Rätzowa tohorunja lětsa swoje powołanske skutkowanje zakónči. Kaž rěčnik krajneho zarjada za šulu a kubłanje (LaSuB) w Kamjenicy Clemens Arndt na naprašowanje SN zdźěli, je nawodnistwo tohole kubłanišća mjeztym wjacore lěta wakantne. Andrea Rätzowa wukonja swoje dźěło jako zastupowaca nawodnica. Tute městno zastupowaceje nawodnicy ma so lětsa wot 1. awgusta znowa wobsadźić a běše runja dalšim mjenowanym pozicijam na karjerowym portalu Swobodneho stata Sakskeje wupisane. Nawodnica Budyskeje serbskeje zakładneje šule Annette Natušowa dźěła jako referentka w Budyskej wotnožce LaSuB.