Prěnje kulojte blido hotuje puć reformam w Instituće za sorabistiku

Lipsk (SN/MG). Něhdźe tři hodźiny su zastupjerki a zastupjerjo Uniwersity Lipsk minjeny pjatk ze zastupjerjemi serbskich institucijow wo přichodźe Instituta za sorabistiku wuradźowali. To bě prěnje posedźenje kulojteho blida, kotrež bě uniwersita loni nazymu do koncepta reformow zapisała (SN wospjet rozprawjachu). Nimo reprezentantow z Lipska běchu mjez něhdźe 15 wobdźělnikami tež zastupjerjo Serbskeho instituta (SI), Techniskeje uniwersity Drježdźany a Braniborskeje techniskeje uniwersity Choćebuz/ Zły Komorow a serbskeju gymnazijow.