Nošerstwo noweje swobodneje šule je prawnisce zaručene

Njebjelčicy (SN/MiR). Powšitkownowužitna towaršnosć Serbska swobodna šula ze sydłom w Njebjelčicach je wot zašłeje wutory jako předewzaće do wikowanskeho registra na Drježdźanskim hamtskim sudnistwje zapisana. Tole su jeje čłonojo a dalši iniciatorojo kubłanišća wčera w gmejnskej žurli w Njebjelčicach zhonili. Z tym je nošerstwo wuwiwaceho so kubłanišća prawnisce zaručene. Jednaćelce stej Anna-Rosina Wjeselina z Chrósćic a Hanka Krawcowa z Drježdźan.

Angažowani entuziasća budu přichodne tydźenje koncept za šulu konkretizować. Rozmysluja wo tym, zajimcow wotwonka zapřijeć. Wučerjo, studenća wučerstwa, pedagogojo, kubłarjo kaž tež socialni dźěłaćerjo, kotřiž su na tym zajimowani, zo tuta šula nastanje, abo kiž bychu na njej wuwučować chcyli, móhli so wote wšeho spočatka do koncepcionelneho planowanja zapřijeć. Wučba na swobodnej šuli ma so w šulskim lěće 2028/2029 zahajić.