Serbske dźěći w Drježdźanach trjebaja podpěru z Łužicy

Drježdźany (SN/MiR). Drježdźanske towarstwo Stup dale prosy z crowfundingowej akciju wo financielnu podpěru. Dnjowa skupina, kotruž Sabina Wagnerowa nawjeduje, je so pomjeńšiła. Hač do kónca awgusta mějachu tam hišće pjeć dźěći, tuchwilu stej to dwě. Problem njeje personalneho razu, přetož kubłarka so w połnej měrje wobstajnje wo kóžde dźěćo stara. Wona je přistajena Serbskeho šulskeho towarstwa, kotrež je nošer skupiny.

Předsyda towarstwa Stup dale Chrystof Cyž pak so přiwšěm financielneje situacije dla starosći. „Čim mjenje dźěći je, ćim mjenje pjenjez towarstwu z Drježdźanskeho měšćanskeho zarjada za financowanje dochadźa“, wón na naprašowanje SN rjekny. Bilanca towarstwa na to pokazuje, zo pobrachuje na konće na wšěch 30 000 eurow. Wšako so kóšty za mzdu, wodu, milinu a podruž za wužiwanje rumnosćow njezniža, najebać to, zo z města mjenje pjenjez dochadźa.