Lwówek Śląski (MD/SN/MiR). Pod hes­łom „Wulki wóz nad městom steji“ wotměchu so w delnjošleskim měsće Lwówek Śląski minjeny kónc tydźenja tři dny trajace Dny poezije a wuměłstwa. Nimo wjacorych basnikow a hudźbnikow z Pólskeje staj so na nimi čěski poet a wudawaćel serbskeje poezije Milan Hrabal z Varnsdorfa a serbski spisowaćel Benedikt Dyrlich wobdźěliłoj. Dale čitaše tam němski basnik a přećel Serbow Peter Geh­risch, iniciator mjenowaneho, před třomi lětdźesatkami zrodźeneho festiwala. Wobstatk festiwalneho programa běchu zdobom přednoški. „Wosebje inspirě­rowaca běše mi rozmołwa w bibliotece městačka wo wuznamje poezije a słowa, kak so na čłowjeka wuskutkujetej a wosebje wo wliwje kumštneje inteligency na literaturu, wuměłstwo a žiwjenje“, rjekny na naprašowanje Serbskich Nowin Milan Hrabal.