Sorabistika w Lipsku zhladuje na 75. róčnicu załoženja

Lipsk (SN/MDź/MG). „Byštej-li Serbski Institut (SI) a Institut za sorabistiku konkurentaj byli, potom by institut za sorabistiku dźensa dobył“, rjekny direktor SI prof. Hauke Bartels z małym posměwkom zašły pjatk na swjedźenskim zarjadowanju składnostnje 75. róčnicy załoženja instituta za sorabistiku na Lipšćanskej uniwersiće. Poćahował bě wón wuprajenje na wulku ličbu postrownych narěčow, kotrež běchu zastupjerjo uniwersity, politiki a serbskich institucijow na spočatku zarjadowanja dźerželi. Sorabistiku w Lipsku běchu 6. septembra 1951 załožili, tehdy hišće z nadawkom, Serbow w Lipsku ze serbskimi wobsahami a diskusijnymi přinoškami zastarać. To wuzběhny ordinarius Edward Wornar w swojim přednošku wo stawiznach a perspektiwach instituta. Wornar bě institut z lěta 2003 dlěje hač lětdźesatkaj nawjedował, tuž so jemu mnozy z přitomnych wosebje dźakowachu.