Projekty w pěstowarnjach a šulach steja w srjedźišću lětušeje kubłanskeje konferency přichodnu wutoru we Łužiskej hali we Wojerecach. Na to pokazujetaj Jens Leschner a Erika Xenofontov z koordinowanišća za kubłanje města Wojerecy.

Wojerecy (KD/SN). Kóždolětna kubłanska konferenca spěchuje wuměnu mjez nimale 150 kubłarjemi a wučerjemi, nawodami kursow na ludowej uniwersiće kaž tež zastupjerjemi zwonkašulskich městnosćow za wuknjenje. Tući a dalši akterojo su krući partnerojo měšćanskeho zarjadnistwa kaž tež přirady za kubłanje, zo bychu wuknjenje na čas žiwjenja za wšitke dźěći, za młodostnych kaž tež dorosćenych zwoprawdźili a na nikoho njezabyli. Projekty, kotrež na konferency předstaja, maja dorosćacym přirodu jako rum dožiwjenja kaž tež wosebite podawki w nazymje 1991 we Wojerecach zbližić.