Kamjenica (dpa/SN). Ze załoženjom prěnjeho krajneho zwjazka chce Zwjazk Sahry Wagenknecht (BSW) do wólbow krajneho sejma a komunalnych zastupnistwow signal wšemu krajej wusyłać. „Je nuznje trěbne, zo maja wšitcy, kotřiž su z prawom přesłapjeni wot knježaceje politiki, skónčnje serioznu alternatiwu, stronu, kotruž móža wolić“, rjekny sobupředsydka strony Amira Mohamed Ali předwčerawšim, sobotu, při załoženju w Kamjenicy. Strona je zwólniwa, k přichodnym wólbam nastupić. Sahra Wagenknecht sama njebě na čłonskej zhromadźiznje přitomna.
Sakski krajny zwjazk nawjeduje přichodnje dwójka: Bywša zapósłanča zwjazkoweho sejma Sabine Zimmermann a předewzaćel Jörg Scheibe. Na zwjazkowej runinje bě BSW hižo kónc januara nastupiła. Nětko ma zakótwjenje w krajach slědować. W Sakskej chce strona w juniju při komunalnych wólbach a w septembru k wólbam krajneho sejma nastupić, zasadźujo so za „rozumnu hospodarsku a energijowu politiku“.
Brüssel (dpa/SN). Ratarjo su dźensa składnostnje zetkanja ratarskich ministrow EU ze swojimi traktorami w Brüsselu swój protest přećiwo ratarskej politice Europskeje unije potwjerdźili. Policija wobydlerjow namołwješe, awto radšo stejo wostajić a so z podzemskej abo z ćahom do nutřkowneho města belgiskeje stolicy podać. Diplomaća EU z toho wuchadźachu, zo so protesty tež na časowy plan zetkanja ministrow wuskutkuja.
Po intensiwnych a zdźěla namócnych protestach europskich ratarjow steja politikarjo přiběrajcy pod ćišćom. W mnohich krajach EU su ratarjo na dróhach, zo bychu mjez druhim přećiwo wikowanskim zrěčenjam EU, běrokratiji a ratarjam škodźacym wobswětowym postajenjam z Brüssela protestowali.
Komisija EU bě na to hižo wšelake wolóženja přilubiła a zakoń za zniženje zasadźenja pesticidow zaso cofnyła.
Zawostajenstwo Kurta Drummera (1928-2000), sławneho telewizijneho kucharja za čas NDR, chowaja wotnětka w kulinariskim archiwje Drježdźanskeje krajneje biblioteki. Prěnje eksponaty su předwčerawšim, sobotu, přepodali. Dotal bě so Kamjeničanski zwjazk kucharjow wo to starał. Drummer pochadźa z Rudnych horin a bě w Kamjenicy kucharić nawuknył. W telewiziji NDR wón hač do 1983 wjace hač 650 króć we wusyłanju „Telwizijny kuchar poruči“ wustupowaše.
Z New Yorkskeho zwěrjenca twochnjena wulka sowa Flaco je mortwa. Prawdźepodobnje bě ptačk do fasady wysokodomu ameriskeje metropole zrazył a sej šiju zwinył. Euraziska sutawa bě w februaru 2023 ze swojeje klětki wulećała, po tym zo běchu njeznaći grót přerězali. Wot toho časa Flaca wobkedźbowachu a stajnje zaso podarmo spytachu, jeho popadnyć.
Washington (dpa/SN). Knježerstwo USA chce składnostnje druheje róčnicy zahajenja wójny w Ukrainje a jako reakciju na smjerć Alekseja Nawalnyja nowe sankcije přećiwo Ruskej wobzamknyć. Sćelak CNN rozprawja po informacijach financneho ministerstwa USA, zo přihotuja chłostanske naprawy přećiwo 500 wosobinam a institucijam. Ruska bě 24. februara 2022 Ukrainu nadpadnyła.
Biden žonu Nawalnyja přijał
San Fracisco (dpa/SN). Prezident USA Joe Biden je so po smjerći kritikarja Krjemla Alekseja Nawalnyja z toho mandźelskej a dźowku w Kaliforniskej zetkał. Biden je wobrazy wo zetkanju wozjewił. Widźeć je Julija Nawalnaja a jeje 23lětna dźowka Darja w rozmołwje z prezidentom USA. Na wobrazu Biden žonu Nawalnyja wobjima. Biden piše, zo je so z woběmaj zetkał, zo móhł jimaj swoje sobužarowanje wuprajić. Nawalny bě 16. februara w jednym z chłostanskich lěhwow Ruskeje žiwjenje přisadźił. Jeho mać je ćěło Nawalnyja mjeztym widźeć směła.
Scholz podpěruje Rutteho
Tel Aviv/Gaza (dpa/SN). Israelski ministerski prezident Benjamin Netanjahu je wěstotnemu kabinetej po informacijach medijow swój plan za zarjadnišćo Gazaskeho pasma po zakónčenju wójny předpołožił. W nim planuje wón – kaž bě to wospjet připowědźił – dospołnu wěstotnu kontrolu po wšěm pobrjóžnym pasmje přez israelske wójsko. Nastupajo přichodneho zarjadnišća Gazaskeho pasma rěka w zakładnym dokumenće, zo chcedźa „lokalnych zastojnikow“ z fachowym nazhonjenjom zasadźić, kotřiž nimaja žane zwisku ke „krajam abo organizacijam, kotrež terorizm podpěruja“.
W Kraju zapadnje Jordana knježacu palestinsku awtonomnu organizaciju w planje wuraznje njenaspomnja. Při wšěm njeje wuzamknjene, zo ju tež w Gazaskim pasmje zasadźa. Žadanje ekstremnych prawicarjow za wobsydlenjom Gazaskeho pasma přez radikalnych Židow, Netanjahu dotal wotpokazuje.