Malešecy (SN/MWj). „Rewolucija manežoweho wuměłstwa“ rěka program, z kotrymž přijědźe cirkus William z Müncheberga, městačka wuchodnje Berlina, přichodne dny do Malešec. Na tamnišim sportnišću při Hućinjanskej dróze natwarja swój wulki cirkusowy stan a w nim wot štwórtka hač do njedźele wjacore razy swoje pokazki prezentuja.
Cirkus „William“ zjednoća moderne kaž tež tradicionalne dźěle cirkusoweho wuměłstwa a kombinuje dresury zwěrjatow z naročnymi artistiskimi poskićenjemi. Tak dožiwja wopytowarjo kumšty dźesać swětłych kamelow runje tak kaž swětłych a ćmowych konjow. Jedyn z wjerškow zwěrjećich pokazkow budźe prezentacija wulkich kóčkow, w kotrejž budu lawy a tigry zhromadnje w maneži widźeć. Ale tež artistisce ma cirkus „William“ někotre wosebitostki w programje, kotrež su samo jónkrótne w Němskej. Tak prezentuje Deniro Wille postoj na rukomaj (Handstand), a to na powjazu. Dale změja w programje smjertne koło, westernsku show a wězo klawna. Mjez wuhotowarjemi programa su tohorunja čěscy artisća.
Budyšin. Składnostnje 200. narodnin Jana Arnošta Smolerja wotměje so štwórtk, 3. měrca, w Budyšinje při jeho pomniku na Cyhelowym nasypje wopomnjenske zarjadowanje. Započatk je w 14 hodź. Samsny dźeń wotměje so swjedźenski wječor w Budyskej Smolerjec kniharni. Wot 19.30 hodź. čitaja čłonojo towarstwa Přećeljo Smolerjec kniharnje z dźěłow a zapiskow Smolerja. Po tym woswjeća zhromadnje 25lětny jubilej kniharnje. Na zarjadowanje přeprošeja Smolerjec kniharnja, towarstwo jeje přećelow a LND.
Maćica Serbska wopomina sobotu, 5. měrca, w 10 hodź. na Budyskim Hrodźišku při swójbnym rowje składnostnje 200. narodnin swojeho hłowneho załožerja a serbskeho budźićela. W 10.45 hodź. zahaji so w Budyskim Serbskim muzeju na česć Jana Arnošta Smolerja akademija. Marka Cyžowa přednošuje wo jeho wuznamje za wuwiće serbskeje hudźby, Trudla Malinkowa wěnuje so swójbnym stawiznam Smolerja.