Lipsk (SN/CoR). Lipšćanski wobydlerski komitej přeproša jutře, 24. měrca, w 16 hodź. do wopomnišća Museum in der Runden Ecke am Dittrichring 24. Tam předstaji historikar dr. Timo Meškank w rozmołwje ze sakskim krajnym społnomócnjenym za podłožki stasi bywšeje NDR Lutz Rathenow knihu „Sorben im Blick der Staatssicherheit“.
Jutře, pjatk, w 20 hodź. wobdźěli so basnica Róža Domašcyna ze zběrku „Die dörfer unter wasser sind in deinem kopf beredt“ na čitanju njewotwisnych nakładnistwow w kofejowni hrajnišća Lindenfels Westflügel na Hähnelowej dróze 27.
Sobotu, 25. měrca, w 13 hodź. prezentujetaj LND a wudawaćel Jürgen Maćij zwjazkaj historiskich fotografijow z Hornjeje a Delnjeje Łužicy „Wotmolowane“, a to na forumje za wěcne knihi w hali 3, stejnišćo E201. Zarjadowanje moderěrować budźe kulturny historikar prof. dr. Bernd Lindner.
Sobotu wot 20.15 hodź. wobdźěla so mjez druhim Róža Domašcyna, Hanka Šołćic a Milan Hrabal na Lipšćanskej nocy přełožowarjow, kotraž budźe w nakładnistwje Leipziger Literaturverlag na Brockhausowej 56.
Chrósćicy. Njezwučene zynki zaklinča sobotu, 14. januara, w 19.45 hodź. w Chróšćanskej putniskej hospodźe. Drježdźanska band Soulmama & friends tam koncertuje. Budźe to akustiske pućowanje skupiny z gitaru, huslemi a spěwom. We wjace hač 20 lětach jewišćowych wustupow je skupina zajimawe slědy zawostajiła. Nimo směrow bigband soul, modern gospel, pop a rock su poněčim tež american folk, blues a country k tomu přišli. Wopytowarjo dožiwja hudźbu k słuchanju, sobuspěwanju a rejwanju, raz wótřišo, raz mjelčišo ze znatymi a mjenje znatymi spěwami.
Tohorunja sobotu, ale hižo w 16 hodź. su dźěći do hospody přeprošene, hdyž chce jim ćeta Monika bajku „Tři złote jabłuka“ bać.