Jubilejne lěto reformacije w Sakskej pod hesłom „My smy tak swobodni“ zahajichu z ekumeniskej swjatočnej Božej słužbu 7. januara w ewangelskim dźělu Budyskeje cyrkwje swj. Pětra. Krajny biskop Ewangelsko-lutherskeje krajneje cyrkwje dr. Carsten Rentzing a Drježdźansko-Mišnjanski biskop Heinrich Timmerevers swjećeštaj kemše. Wjetši serbski podźěl swjatočnosće bě Serbske ewangelske towarstwo nastorčiło.

19 wosobow z nimale wšěch kónčin dwurěčneje Łužicy je iniciatiwa Serbski sejm 28. januara we Wojerowskim hrodźe do Rady starostow powołała.

Ptači kwas kaž tež póstnicy wopokazachu so jako runje tak woblubowanej nałožkaj kaž hižo w minjenych lětach. Serbski ludowy ansambl swjećeše ze swojim programom samo „dejmantny kwas“ – mjeztym 60 lět wuměłcy SLA přihladowarjow po cyłej Łužicy zawjeseleja.

Najwjetši kulturny podawk w Serbach bě bjezdwěla XII. mjezynarodny folklorny festiwal „Lužica“. W smažniku dožiwichu zahorjeni přihladowarjo kulturne skupiny z Egyptowskeje, Kolumbiskeje, Grjekskeje, Burundija, Ameriki, Norwegskeje, Běłoruskeje, Awstriskeje, Čěskeje, Pólskeje, Madźarskeje, Rumunskeje, Chorwatskeje, Słowakskeje, Němskeje a Italskeje w Budyšinje, Hochozy a w Chrósćicach. Wězo běchu tež nimale wšitke serbske ćělesa ludoweje hudźby a reje w programje zastupjeni.

Dalši wuměłski wjeršk bě znowapředstajenje „Serbskich jutrow“, duchowneho oratorija na libreto Chrysty Meškankoweje a hudźbu Jana Cyža. A inscenacija „Olsenowa cwólba wupućuje“ wobradźi­ Němsko-Serbskemu ludowemu dźiwadłu rekordnu ličbu přihladowarjow.

Třeća wosebita wustajeńca Budyskeho Serbskeho muzeja wěnowaše so najskerje najznaćišej serbskej mytiskej bytosći. Wulce a wobšěrnje zapołoženy projekt „Krabat – Muž – Mytos – Marka“ wuwjercholi w třidźělnej přehladce, kotraž ma so po finisaži w jutrowniku lětsa nimale dospołnje zachować.

Lěćo 2017 bě lěćo wuměłstwa. Byrnjež mjezynarodny swjedźeń poezije internych diferencow w Zwjazku serbskich wuměłcow dla wupadnył, su z počesćenjom Jurja Chěžki – wón měješe w srjedźišću festiwala poezije stać – wuznamneho serbskeho awantgardista-basnika dostojnje wopominali.

Wulki wothłós zbudźi 11. mjezynarodna dźěłarnička rězbarjow a socharjow w Miłočanskej skale. Zarjadowarjo běchu runja wuměłcam přewšo spokojom, a wulke připóznaće publikuma da organizatorow wo dalšim rozšěrjenju rozmyslować. 19. nukstock-openair přiwabi wjace hač 700 přećelow njewšědnych njekomercielnych zynkow k Nukničanskej skale.

Jan Buk, nestor serbskeho tworjaceho wuměłstwa, woswjeći swoje 95ćiny.

Sportowy wjeršk lěta 2017 we Łužicy bě hra prěnjeho koła sakskeho koparskeho pokala mjez SJ Chrósćicami a FSV Zwickauwom. Domjacy drje 0:5 podležachu, hladajo na skoro 800 přihladowarjow a na fakt, zo bě prěni raz po přewróće profijowe mustwo z hosćom wi­nowatostneje­ hry, směmy wuslědk přiwšěm za wuspěch wopisać.

Razna kritika předpředchadnika Kurta Biedenkopfa bě ćišć na sakskeho pre­miera Stanisława Tilicha powjetšiła. Tilich namjetowaše Zhorjelčana Michaela Kretsch­mera (CDU) za naslědnika na čole sakskeje CDU a knježerstwa. 12. hodownika je oficialnje wotstupił. 13. hodownika bu Kretschmer w Drježdźanach za noweho ministerskeho prezidenta Sakskeje wuzwoleny. Serbskim temam wšak so dotal konkretnje wuprajił njeje.