Wšitke generacije wot wirusoweje gripy potrjechene

póndźela, 22. februara 2016
artikl hódnoćić
(0 )

Budyšin/Biskopicy (SN/mwe). Wot spočatka lěta hač do srjedź februara su hłownje w Budyskej chorowni 17 pacientow z diagnozu gripalneho infekta lěkowali, w Biskopičanskej runje telko. K tomu přińdźe pjeć pacientow w Budyskej chorowni z diagnozu wirusowa gripa. Generelnje běchu wšitke starobne skupiny potrjechene, wot małeho dźěsća hač k staršemu čłowjekej. Najstarša pacientka bě 83 lět. W Biskopičanskej chorowni je ličba ludźi, kotřiž běchu na zahorjenje płucow abo na bronchitis schorjeli, minjene dny přiběrała. Ličba chabła mjez pjeć do dźesać pacientami na dźeń. ­Čujomne znamjo normalneho wirusoweho infekta su drapanje w šiji, šnupa, kašel a třichanje. K tomu přińć móže ­často tež hłowybolenje. Infekt wupřestrěwa so relatiwnje pomału a so spěšnje zaso zhubi. Po něhdźe dwěmaj do třoch dnjach je wjeršk docpěty a pacientej so zaso lěpje dźe.

Influenca porno tomu cyle spěšnje přińdźe, kaž z ničeho. Čłowjek čuje so jara chory, ma wysoku zymicu a jeho wšitke stawy bola. Byrnjež wšitke generacije potrjechene byli, su wosebje starši ludźo a chronisce schorjeni potrjecheni. Jara młodźi pacienća su wosebje wysokeje zymicy dla wohroženi. Při jara ćežkich wotběhach móža so płuca zahorić. Jako škit měli ludźo nimo šćěpjenja přećiwo gripje kedźbować, zo so strowi a z wjele witaminami zežiwjeja, sportuja, na čerstwym powětře so pohibuja a sej časćišo ruce myja. Lěkarjo tuž radźa, zo sej ludźo w času, hdyž so nazymnjenske chorosće a gripowe wiry razantnje rozmnožeja, ruku njedawaja. Njech sej radšo zdwórliwy posměwk popřewaja“, měni Steffen ­Lahode, rěčnik Hornjołužiskich klinikow.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND