Wjele družkow w procesionach

štwórtk, 26. meje 2016
artikl hódnoćić
(0 )
Runje tak kaž w tamnych serbskich wosadach kročachu wěriwi z družkami na čole w Njebjelčicach dźensa po dopołdnišej Božej mši k wonkownemu wołtarjej, kotryž steji tam na kěrchowje wosrjedź wsy. SN/Maćij Bulank (2)/Bosćij Handrik Runje tak kaž w tamnych serbskich wosadach kročachu wěriwi z družkami na čole w Njebjelčicach dźensa po dopołdnišej Božej mši k wonkownemu wołtarjej, kotryž steji tam na kěrchowje wosrjedź wsy. SN/Maćij Bulank (2)/Bosćij Handrik

Katolscy křesćenjo swjeća wulki swjaty dźeń Božeho ćěła

Ralbicy (SN/MWj). Nimo jutrow, hód a swjat­kow je swjaty dźeń Božeho ćěła sobu najwažniši cyrkwinski podawk katolskich křesćanow. Na wosebite wašnje tež w serbskich wosadach wuznawaja, zo wěrja do přitomnosće Jězusa Chrystusa we woblatku. A činja to zjawnje a na swjatočne wašnje w procesionach. Po dopołdnišich kemšach podachu so dźensa wěriwi přewažnje w ćmowej drasće a kěrluše spěwajo k wonkownym wołtarkam. W Ralbicach na přikład maja tajki na nawsy blisko Statnikec. Kěrluše po puću kaž tež při wołtarku přewodźachu zwjetša wosadni dujerjo.

Wosebity swjedźenski raz spožčeja swjedźenjej Božeho ćěła kóžde lěto družki, kotrež su so tež dźensa zaso we wulkej ličbje na kemšach a na procesionach wobdźělili. Za to wone někotružkuli ćežu na so bjeru, wšako dyrbja zdźěla hižo wosrjedź nocy stawać. Runočasnje maja hotowarniče w nócnych a rańšich hodźinach wjele dźěła, zo bychu wšitke družki sčasom zdrasćili. Runja zašłym lětam sy tež tónraz na mnohich městnach wuhladał žony a holcy, kotrež běchu k tutej składnosći katolsku swjedźensku drastu woblečene.

Hinak hač we wjacorych zwjazkowych krajach swjedźeń Božeho ćěła w Sakskej statny swjaty dźeń njeje, jenož w někotrych dwurěčnych katolskich gmejnach.

wozjewjene w: Lokalka

Galerija

dalši wobraz (1) Tójšto družkow spožčichu tež Ralbicach kemšam a procesionej k wonkownemu wołtarjej na nawsy wosebity swjedźenski raz. Dalše wobrazy namakaće na našej internetnej stronje pod: www.serbske-nowiny.de.
dalši wobraz (2) Leńka Wróblowa, Božena Wróblowa a Blanka Šmitowa (wotlěwa) su Radworske družki sobu zhotowali.
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND