Zo móhli dobrowólni wobornicy stajnje a wšudźe hašeć a pomhać, dyrbja derje wukubłani być, čehoždla často zwučuja. W Narćanskej wohnjowobornej šuli móža to nětko we wosebitym domje činić­, w kotrymž hodźa so wšelake družiny wohenja simulować.

Narć (SN/MWj). Hišće lěpje a pod realistiskimi wuměnjenjemi hašeć zwučować móža nětko w Narćanskej wohnjowobornej šuli. Tam přepodachu wčera nowonatwarjeny zwučowanski dom, w kotrymž móža najwšelakoriše scenarije napodobnić. Po słowach sakskeho nutřkowneho ministra Markusa Ulbiga (CDU) je to po wšej Europje jedne z najmodernišich wukubłanišćow za zwučowanja z wohenjom. Kaž Ulbig wčera rjekny, moderne twarske wašnja a nowe twarske maćizny w padźe wohenja zestawu kura měnjeja a temperaturu wohe­nja zwyšeja. Na tele strachi dyrbja so wobornicy přihotować móc. Za to maja w Narću nětko optimalne wuměnjenja, štož nazornje demonstrowachu.