Na Budyskim nalěću serbske barby widźeć a zynki słyšeć byli
Budyšin (CS/SN). Hromadźe z tysacami hosći, mjez nimi z oficialnymaj delegacijomaj partnerskeju městow Heidelberg a Jablonec, swjećachu Budyšenjo minjeny kónc tydźenja swoje 1014. Budyske nalěćo. Na oficialnym wotewrjenju sobotu připołdnju móžeše wyši měšćanosta Alexander Ahrens (njestronjan) samo zastupjerja z pósłanstwa Nikaraguwy witać, kiž so do złoteje knihi města zapisa. Tohorunja sobotu wotmě so dźeń towarstwow, wotbłyšćowacy mnohostronskosć towarstwoweho žiwjenja w sprjewinym měsće. Samsny dźeń bě po dlěšej přestawce zaso raz Serbski ludowy ansambl na měšćanskim swjedźenju prezentny. Na jewišću na Žitnych wikach poskićichu chór, orchester a rejwarjo pisany program, kotryž dopokaza, zo móžeš folkloru tež modernje a čerstwje na jewišću předstajić. Nałožki a wašnja kaž kwasna ceremonija drje k tomu słušeja, rejwarjo pak interpretowachu wšelake temy tež dosć načasnje w jednorych a modernych kostimach. Runje tak dobry wothłós žnějachu dorostowi rejwarjo skupiny Łužičanka.
