„Rejwanje zwjazuje“ rěkaše hesło mjeztym šesteho drastoweho bala zawčerawšim, sobotu, w Ćišćanskim hosćencu „K zelenemu wěncej“. Wjacore rejwanske a drastowe skupiny běchu přeprošenje sćěhowali.
Ćisk (JT/SN). Jedna z wosebitosćow Ćišćanskeho drastoweho bala je tradicionalny zaćah rejwanskich a drastowych skupin, čemuž přizamknje so zhromadna poloneza, kotruž bě tež lětsa zaso Helga Hansch choreografowała. K tomu witaše nawodnica Serbskeje rejwanskeje skupiny Ćisk Gabriela Linakowa domizniske a drastowe towarstwo z błótowskich Bórkowow kaž tež Čornochołmčansku, Židźinsku a Brětnjansku drastowu skupinu. „Wjeselu so, zo je telko ludźi w narodnej drasće přišło“, rjekny Gabriela Linakowa trochu wolóžena, dokelž mějachu skupiny samsny dźeń hišće dalše terminy. Z wulkim přikleskom witachu šlagrowu spěwarku Ingrid Rakec. Składnostnje rjadowniskeho zetkanja w Budyšinje bě wona kónc tydźenja pola swojeho bratra we Wojerecach a poby na drastowym balu, zo by stare dopomnjenki wožiwiła.