Salow (aha/SN). Nimale wšitcy Salowčenjo dožiwichu sobotu wječor na Salowskej nawsy před rjanej kulisu z kapałku a hatom dostojne mejemjetanje. Hač­runjež bě 23lětny Markus Kochta hakle njedawno předsydstwo tamnišeho młodźinskeho kluba ze zawjazowacym mjenom Katolska wjesna młodźina z jeho něhdźe 40 aktiwnymi čłonami přewzał, swědčeše derje organizowany a rjany swjedźeń wo tym, zo ma młody muž wotežki w horšći. „Wot wšeho spočatka bě mi jasne, zo budźe to wulke wužadanje. Dokelž su dźěłowe městna našich młodostnych hustodosć chětro zdalene, zwostawa jenož kónc tydźenja, zo so zetkawamy. Za wažne mamy, při pěstowanju nałožkow tež na maćeršćinu dźiwać“, hódnoćeše Markus Kochta.