Awtomatiski system spóznawanja jězdźidłowych značkow předstajili

Wóspork (SN/MWj). Při zakročenju přećiwo mjezy přesahowacej kriminaliće policisća Sakskeje a Čěskeje republiki wusko hromadźe dźěłaja. Jedne z ćežišćow je wuslědźić padustwa jězdźidłow resp. tomu zadźěwać, zo paduši pokradnjene awta ilegalnje přez hranicu dowjezu. Při tym zasadźeja na woběmaj bokomaj hranicy awtomatiski system spóznawanja jězdźidłowych značkow (AKES). We wobłuku zhromadneho zwučowanja su sakscy a čěscy zastojnicy zawčerawšim pola Wósporka swój system předstajili.

„Tónle system njewuskutkuje žane dźiwy, ale je wažny dźěl našeho dźěła. Technika policiji pomha, njeskutkam zadźěwać abo je wuslědźić“, rjekny Zho­rjelski policajski prezident Conny Stiehl. Jeho zarjad wužiwa system AKES wot lěta 2013 a je jón dotal něhdźe 700 razow zasadźił. Při tym wuslědźichu 380 awtow, za kotrymiž hižo pytachu. Dwěsćě z nich njebě zawěsćenych, w 120 padach su za wěstej wosobu pytali, štyrceći awtow bě pokradnjenych a w dwaceći padach jednaše so wo kradnjene awtowe čisła.