Biskop Reinelt z wjace hač 2 000 dźěćimi-putnikami Božu mšu swjećił
Róžant (SN/mwe). Wjace hač 2 000 dźěći z cyłeje Sakskeje a biskopstwu Drježdźany-Mišno přisłušaceje kónčiny Durinskeje bě so dźensa dopołdnja do Róžanta podało, zo bychu na hnadownym městnje swoje putnikowanje dožiwili. Tajke so kóžde druhe lěto wotměwa, a nimo Róžanta swjeća holcy a hólcy wulku putnisku Božu mšu we wotměnje z Wechselburgom. Dźensa bě jeje hłowny celebrant něhdyši Drježdźansko-Mišnjanski biskop Joachim Reinelt. Prědował je dźěćacy dušepastyr biskopstwa Ralph Kochinka. Kemše na rjenje wuhotowanej Róžeńčanskej putniskej łuce – byrnjež so rano hišće mócnje dešćowało – wobrubichu Drježdźanski dźěćacy chór a serbske šole. Berlinska kapała Patchwork spěwarjow přewodźeše. Mjez próstwami běchu tež serbske. Prjedy hač so putnikowanje popołdnju z nyšporom zakónči, móžachu so dźěći we wobłuku mnohich zaběrow tež kreatiwnje pospytać.
