9. a 10. julija nadźijeja so Njebjelčanska gmejna a jeje towarstwa na prawje wjele­ wopytowarjow, hdyž přewjedu swój mjeztym hižo dwacety Mjezynarodny­ gmejnski swjedźeń.

Njebjelčicy (HS/SN). Na dlěši čas wjace­dnjowski swjedźeń z kopicu kulturnych a sportowych zarjadowanjow wuhotować, swědči wo wutrajnosći a prócy zhromadnosć hajić a spěchować. W popře­wrótowej euforiji zrodźichu Njebjelčanska gmejnska rada, tehdyši wosadny farar Michał Brězan a wjesnjanosta Tomaš Čornak (CDU) mysličku, kulturne wulkozarjadowanje do žiwjenja zwołać. Tajke zwoprawdźić pomhaše jim partnerska komuna z Bad Honnefa. A tak wotmě so w Njebjelčicach w juliju 1992 prěni Mjezynarodny gmejnski swjedźeń. Mjezynarodny bě wón tohodla, dokelž mějachu hižo do přewróta styki k wuchodnym susodam a dokelž běchu nowe do zapadneje Europy k tomu přišli. Rozsudne pak bě, zo su towarstwa w gmejnje za tónle zaměr swoje mocy zjednoćili.