Zjawny list města Wojerec Budyskemu krajnoradnemu zarjadej
Wojerecy (SN/MWj). Po tym zo je Budyski wokrjesny sejmik na swojim posedźenju 13. junija koncepciju ležownosćow wobzamknył, reaguje město Wojerecy na to ze zjawnym listom. Podpisali su jón nimo wyšeho měšćanosty Stefana Skory (CDU) předsydźa frakcijow měšćanskeje rady CDU, Lěwicy, SPD a Aktiwne Wojerecy. W koncepciji ležownosćow bě wokrjesny sejmik wobzamknył, koncentrować wokrjesne zarjadnistwo w Budyšinje a w Kamjencu a nimo toho wotnajeć Budyske dwórnišćo za zarjadniske zaměry. We Wojerecach ma porno tomu „rozšěrjeny wobydlerski běrow“ zwostać. Koncepcija dale předwidźi, zo změje wokrjesne zarjadnistwo w lěće 2025 w Budyšinje 600 dźěłowych městnow, w Kamjencu 700 a we Wojerecach 50.
