Z pěstowarnju a šulu wuwija zarjadniski centrum
Chrósćicy (SN/MWj). Ze swojeho tuchwilneho městna w sydarni „Łužica“ wosrjedź wsy móhło Chróšćanske gmejnske zarjadnistwo do bywšeje srjedźneje šule přećahnyć. Tam móhłoj tohorunja běrowaj regionalneje rěčnicy Domowiny a sobudźěłaćerki Załožby za serbski lud nastać. Před tymle pozadkom chce gmejna wohnjoškitny plan za bywše kubłanišćo přiměrić. Kaž wjesnjanosta Marko Kliman (CDU) na zašłym posedźenju gmejnskeje rady rozłoži, wuchadźa dotalny wohnjoškitny plan z toho, zo dwě rjadowniskej rumnosći na hornim poschodźe šule zaměstnja. Chcedźa-li pak dalše rumnosće wužiwać, dyrbja plan wotpowědnje změnić. A potom móhli na kromje wsy takrjec Chróšćanski zarjadniski centrum z pěstowarnju, kubłanišćom a běrowami wutworić.