Najskerje je Hodźij jenička wjes dwurěčneho regiona, hdźež maja hnydom štyri šulske twarjenja. Dźensniša zakładna šula je w nowotwarje z lěta 1980. Tamne domy su sej po saněrowanju swój poprawny napohlad zachowali, ale so dźensa rozdźělnje wužiwaja.

Prěnja šula w Hodźiju bu 1572 natwarjena, hižo wosom lět pozdźišo pak so wotpali. Po tym zo běchu je znowa natwarili, su kubłanišćo hač do lěta 1733 wužiwali. Dalši šulski twar, wo kotrymž je znate, zo bě 311 tolerjow płaćił, je hač do dźensnišeho zdźeržany. Wužiwaja jón jako­ skład za nastroje za hladanje kěrchowa.