Sydom króć wšitke dźewjeć

srjeda, 20. julija 2016
artikl hódnoćić
(0 )
Dobyćerjow kehelowanskeho wubědźowanja mytowachu z wužitnymi darami. Wjeselić móžachu so pola žonow Uta Kocorowa, pola dźěći Leon Kral a pola muži Michał  Vacek (wotlěwa). Foto: Alfons Handrik Dobyćerjow kehelowanskeho wubědźowanja mytowachu z wužitnymi darami. Wjeselić móžachu so pola žonow Uta Kocorowa, pola dźěći Leon Kral a pola muži Michał Vacek (wotlěwa). Foto: Alfons Handrik

Jedyn z najwoblubowanišich podawkow w běhu lěta je za Smjerdźečanow kehelowanski swjedźeń, na kotrymž so wšitke starobne skupiny wobdźěleja.

Smjerdźaca (aha/SN). Hakle druhe lěto steji 21lětny Pětr Rječka na čole agilneho Smjerdźečanskeho młodźinskeho kluba, kotryž ma něhdźe 30 čłonow. Znowa su woni mjeztym 36. raz wot minjeneho pjatka do njedźele sportowe a zabawne wubědźowanje wuhotowali, za čož žnějachu wulke připóznaće.

Dohromady wubědźowało je so 49 muži, 23 žonow a 17 dźěći. Dorosćeni mějachu 15 kulow kuleć, dźěći dźesać na skrótšenej­ čarje. Za čas wubědźowanja bě to dohromady 1 250 kulow, a 3 716 kehelow je padnyło. 158 króć dźěše kula do wobhrody (Bande). Za to pak přihladowarjo wulce wyskachu, jako sydom króć wšitke dźewjeć kehelow padny. Sobotu­ popołdnju so to Smjerdźečanam samo šěsć razow poradźi.

Mjez dźěćimi bě Leon Kral ze 44 kehelemi před Antonom Wićazom a Markom Młodźinkom najlěpši. Mjez žonami wopokaza so Uta Kocorowa z 68 kehelemi jako najwuspěšniša. Snadnje podležeštej jej Tabea Wićazec (64) a Karolin Rječkec (63). Pola muži doby Michał Vacek z 83 kehelemi. Jemu slědowaše Měrćin Šěn, kiž je jeničce štyri drjewa mjenje powalił. Třeći, Stefan Kral, docpě 76 kehelow.

Mjeztym wosmy raz wotměchu lětsa kehelowanje royal. Za jedyn euro smědźachu wobdźělnicy tři kule kuleć. Při tym dźěše wo to, najwjetšu třicyfrowu ličbu docpěć. Sy-li potajkim z prěnjej kulu jenož mało kehelow powalił, sy ličbu na třeće městno stajił, je-li pak wjele kehelow padnyło, da wězo ma prěnje městno. Jako najlěpši z tohole wubědźowanja wuńdźe Stefan Kral z 8-5-2 před Heikom Bušku a Renéjom Bulankom, kotrajž docpěštaj 7-8-5 resp. 7-5-4.

Předsyda Smjerdźečanskeho młodźinskeho kluba Pětr Rječka a čłon před­sydstwa Měrćin Šěn přepodaštaj wšěm wobdźělnikam myto, dobyćerjam k tomu pokal. Wuběrnu organizaciju swjedźenja wědźachu sej wšitcy přitomni chwalić, předewšěm tež dobre zastaranje z jědźu a napojemi.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND