Dróha, chódnik, pěstowarnja

štwórtk, 08. septembera 2016
artikl hódnoćić
(0 )
Dźěrata a njeruna dróha mjez Nuknicu a Lejnom je dawno zrała za ponowjenje. Ju wužiwać bě dotal jězdźidłam a šoferam wosebite wužadanje. Prěni wotrězk nětko ponowja. Dobry to wuhlad za wužiwarjow přihódneho zwiska.  Foto: Jan Kral Dźěrata a njeruna dróha mjez Nuknicu a Lejnom je dawno zrała za ponowjenje. Ju wužiwać bě dotal jězdźidłam a šoferam wosebite wužadanje. Prěni wotrězk nětko ponowja. Dobry to wuhlad za wužiwarjow přihódneho zwiska. Foto: Jan Kral

Ze spěchowanskimi srědkami móža w Chróšćanskej gmejnje nětko započeć dróhi porjedźeć. Prěnja naprawa k tomu budźe, zo ponowja wotrězk mjez Nuknicu a Lejnom. Za to su gmejnscy radźićeljo wčera nadawk přepodali.

Nuknica (JK/SN). Nowa Chróšćanska pěstowarnja budźe 2. oktobra swjatočnje wotewrjena. Poslednje dźěła na nowo­twarje a wokoło njeho derje postupuja, tak zo móža wuhotowanje dotalneje pěstowarnje posledni tydźeń septembra do noweje přewozyć. 4. oktobra potom prawidłowne dźěło w nowym dźěćacym přebywanišću zahaja. Tole zdźěli Chróšćanski wjesnjanosta Marko Kliman (CDU) na wčerawšej zhromadźiznje gmejnskeje rady w Nuknicy. Wokomiknje so gmejna hišće wo to prócuje, zastaranje z wobjedom wot januara 2017 zaručić, wšako wobhospodarjerce Ralbičanskeje šulskeje kuchnje, kotraž tuchwilu hišće wobjed dodawa, kónc lěta přestanjetej. Naslědnistwo dotal hišće rozjasnjene njeje.

Po tym zo su spódk dróhi mjez Lejnom a Nuknicu přepytowali a jón jako kmany a nošny posudźowali, móža so dźěła ponowjenja zahajić. Radźićeljo su wčera wozamknyli, nadawk dać Budyskej firmje SLB GmbH, kotraž započnje w oktobru za 31 600 eurow na prěnim 200 metrow dołhim wotrězku dźěłać.

Wjeselić móža so Chróšćenjo na Hórnikowej. W zwisku z ponowjenjom wo­krjesneje dróhi K 9230 nastanje na lěwej stronje do směra na Wudwor wot Wroblec hač k wotbóčce do Stareje Cyhelnicy plestrowany chódnik. Hišće tónle tydźeń započina dróhotwarski zawod stary plester wutorhać. Roły za wopłóčki po po­trjebje ponowja, prjedy hač jězdnju po kermuši asfaltuja. Chódnik twarja jenož na jednym boku, dokelž njeje Hórnikowa na potrjechenym wotrězku šěroka dosć. Na tamnej stronje dróhi kromu ze zornowcowym kamjenjom skruća.

Gmejna Chrósćicy, tamniša lajska dźiwadłowa skupina a Nukničanski wjesny klub su wutworili gremij, zo bychu přihotowali a přewjedli swjatočne wopominanje 80. róčnicy předstajenja hry „Paliwaka“ na Kopšinjanskim hrodźišću. Wopomnjenske­ zarjadowanje budźe 30. septembra na hrodźišću. Hižo nětko su wšitcy zajimcy a přećeljo zbliska a zdaloka­ wutrobnje přeprošeni.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND