Žarowansku halu na Kinajchtskim lěsnym pohrjebnišću su minjene tydźenje a měsacy wobšěrnje přetwarjeli a saněrowali. Wčera su ju nětko oficialnje přepodali.

Kinajcht (UH/SN). Po jednym lěće twarskich dźěłow móža so na Kinajchtskim pohrjebnišću zaso dostojnje ze zemrětymi rozžohnować. Hižo loni w septembru běchu žarowansku halu wonkownje ponowjeć započeli, nowe wokna a zachodne durje zatwarili kaž tež fasadu energetisce saněrowali. Lětsa z ponowjenjom nutřka pokročowachu. Rumnosće z čerstwej barbu wobarbichu a kamjentne špundowanje wurjedźichu. Nimo toho ponowichu sanitarne připrawy kaž tež zwukowu a swětłowu techniku. W pódlanskim twarjenju wuhotowachu dwě dźěłowej městnje a zatwarichu mału kuchnju. Jako wuslědk rekonstrukcije njejsu so jeno zjawnje wužiwane rumnosće polěpšili, ale tež wuměnjenja za sobudźěłaćerjow.