Łužiske nazhonjenja za Ekuador

wutora, 13. septembera 2016
artikl hódnoćić
(0 )
Wjesnjanosta Tomaš Čornak (CDU) je tele dny swojeho ekuadorskeho kolegu w zastojnstwje Guillerma Churuchumbija (2. a 3. wotprawa) a jeho přewodźerjow w Njebjelčicach witał a jim wšelke zajimawostki wsy pokazał.  Foto: Helmut Schippel Wjesnjanosta Tomaš Čornak (CDU) je tele dny swojeho ekuadorskeho kolegu w zastojnstwje Guillerma Churuchumbija (2. a 3. wotprawa) a jeho přewodźerjow w Njebjelčicach witał a jim wšelke zajimawostki wsy pokazał. Foto: Helmut Schippel

Hósć wo zarjadnistwje, kubłanju a sobupostajowanju so wobhonił

Njebjelčicy (HS/SN). Zo we wsy Njebjel­čicach hdys a hdys wukrajnych hosći witaja, tak njewšědne njeje. Zo pak tam wjesnjanosta z Ekuadora přijědźe, bě tele dny premjera. Guillermo Churuchumbi přisłuša prawobydlerjam južnoameriskeho kraja, kotřiž wučinjeja něhdźe třećinu dohromady 16 milionow wobydlerjow. We wustawje je jich runoprawosć we wšitkich wobłukach zapisana, we wopraw­dźitosći pak wona dawno hišće docpěta njeje. Jako prěni indigeny (prawobydlerski) wjesnjanosta kraja chce Guillermo Churuchumbi tole změnić. W stolicy Quito­ je wón kubłanske wědomosće studował. Jeho funkciju na čole kantona Cayambe z 85 000 wobydlerjemi móhli w Němskej skerje z tej krajneho rady přirunać. Jeho najwažniše zaměry su kubłanska runoprawosć prawobydlerjow, jich samopostajowanje nad zemskimi pokładami a zachowanje jich rěče a kultury.

Guillermo Churuchumbi je za čas studija mjez druhim załožbu Rosy Luxemburg zeznał, kotraž ma tež w ekuadorskej stolicy běrow. Sobudźěłaćerjo Berlinskeje załožby namjetowachu jemu, dojěć sej do Łužicy. Tak wopyta wukrajny hósć tele dny klóšter Marijinu hwězdu w Pančicach-Kukowje, socioekologiski centrum při Miłočanskej skale a přede­wšěm Njebjelčansku gmejnu. Tam za­jimowaše so za wobydlerjam bliske zarjadnistwo, za dwurěčne kubłanje, za demokratiske sobupostajowanje, za ener­gijowu změnu, za infrastrukturu kaž tež za towaršliwe žiwjenje na łužiskich wsach. Na wopyće gmejnskeho centruma, noweje pěstowarnje, cyrkwje, Heldec hospody a dalšich městnow jemu wjesnjanosta Tomaš Čornak­ (CDU) načasne zhromadne žiwjenje w Njebjelčicach rozłoži. Hósć z Ekuadora porno tomu znazorni, zo su w jeho domiznje hižo něštožkuli docpěli. Mjez druhim spěchuja studij młodych prawobydlerjow, přewostajeja wjesnym zhromadźenstwam pjenjezy a material za projekty a podpěruja demokratiske sobupo­stajowanje. „Njeńdźe wo to, zo ludźo čakaja, zo by stat za nich něšto činił. Skerje měli woni wo direktnej demokratiji sobu rozsudźeć a w njej sobu skutkować, zo bychu zarjadnistwo a wobydlerjo woprawdźe hromadźe dźěłali“, podšmórny Guillermo Churuchumbi.

Na konkretne projekty so Njebjelčenjo a jich južnoameriski hósć dojednali njejsu. Za to je zdalenosć mjez nimi přewulka. Ale wědźeć, zo tež w druhich kónčinach swěta etniska mjeńšina swoje prawa zwoprawdźić spyta, je zetkanju komunalneju polikarjow wosebity raz spožčiło.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND