W jednanju wo Budyske rubjene časniki w nowembru 2015 je sudnistwo wusudaj wuprajiło. Wonej njemóhłoj rozdźělnišej być. Mjeztym zo dyrbi 29lětny Wojciech K. šěsć lět do jastwa, bu 23lětny Wojciech W. wuwinowany.
Sudnica Carmen Becker je w swojim wopodstatnjenju wusudow hišće raz njewšědne wuwiće procesa w běhu jeho štyrjoch jednanskich dnjow zjimała, štož na kóncu k tomu wjedźeše, zo so podhlad přećiwo Wojciechej W. kaž pucher pukny. Statny rěčnik Peter Terres bě do toho w swojim pledoajeju sydom lět a dźewjeć měsacow jastwa za Wojciecha K. žadał. Na zakładźe namakanych slědow DNA w jednej rukajcy a na masce ma wón za dopokazane, zo bě starši wobskorženy na njeskutku wobdźěleny. „Njeje žanych wolóžacych, ale wjele poćežowacych faktorow“, wobkrući Terres jasnje nad minimalnym chłostanjom pjeć lět ležacy namjet statneho rěčnistwa. Při nadpadźe bu trašacy płun jako bróń zasadźeny, štož je k strowotniskim poćežowanjam nadpadnjeneho Budyskeho juwelěra a jeho dźowki wjedło. Tež hódnota rubizny nimale 12 000 eurow je poćežowacy faktor.