Zhubja drohotny čas

wutora, 27. septembera 2016
artikl hódnoćić
(0 )

Wonkowny posudźowar za wohnjowoborny plan trěbny abo nic?

Wulka Dubrawa (CK/SN). Swój wohnjowoborny plan chce Wulkodubrawska gmejna dale wjesć a wudospołnić. To je trjeba, zo by spěchowanske srědki za hižo dołho planowanu nowu gratownju w Klukšu dóstała, wobkrući wjesnjanosta Lutz Mörbe (njestronjan) na zašłym posedźenju gmejnskeje rady. Do plana maja so tajke změny zapisać kaž nakup noweho jězdźidła, přidatne městno za hašensku wodu a dalše. Štyri inženjerske běrowy su poskitk wotedali. Wone žadaja sej mjez 6 900 a 10 200 eurami.

Frakcija CDU přednjese wótru kritiku. Tobias Hilbert njewidźi žanu přičinu, wohnjowoborny plan eksternje předźěłać dać. „Njeńdźe tola wo bytostne změny, kaž su wone kóžde dźesać abo 15 lět trěbne, ale jeničce wo redakcionelne korektury“, wón rjekny. Te móhło gmejnske zarjadnistwo runje tak zadźěłać. Zo měł so hižo po štyrjoch lětach znowa eksterny wěcywustojny z tym zaběrać, ma wón za „wonmjetane pjenjezy“. Kaž Martin Meier (CDU) rozłoži, njeje eksterne pře­dźěłanje plana wuměnjenje za spěchowanske srědki. Tež wobličenje potrjeby na wědomostnym zakładźe, kaž wot wjesnjanosty žadane, wuraznje předpisane njeje. Torsten Kunth (Njewotwisne wolerske zjednoćenstwo) wupraji so za eksterneho posudźowarja. Što pak, jeli tón zwěsći, zo w Klukšu scyła žanu nowu gratownju njetrjebaja? Tele prašenje wosta na posedźenju gmejnskeje rady njewotmołwjene. Zo je nowotwar tuńši hač saněrowanje tuchwilneho objekta, je hižo dawno jasne. Nětko pak zańdźe znowa třištwórć lěta drohotneho časa, Tobias Hilbert porokowaše.

Šěsć radźićelow hłosowaše za eksterneho posudźowarja, štyrjo běchu přećiwo tomu, jedyn so hłosa wzda. Wosta­nu-li po pruwowanju poskitkow wudawki pod 10 000 eurami, móže wjesnjanosta sam nadawk jednomu ze štyrjoch inženjerskich běrowow dać. Hewak je to naležnosć zarjadniskeho wuběrka.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND