Jědźny plan hižo přihotuja

štwórtk, 01. decembera 2016
artikl hódnoćić
(0 )

Na zhromadnym posedźenju techniskeho wuběrka gmejny Ralbicy-Róžant a zastupjerjow Chróšćanskeje gmejny a pěstowarnje kaž tež staršiskeje přirady Ralbičanskeje pěstowarnje su wčera rozsudźili, štó budźe wot 2. januara w Ralbičanskej šulskej kuchni warić.

Róžant (JK/SN). Dojednali su so na rodźeneho Peručana Alarcona Cardenasa-Hančika, kiž je ze Serbowku woženjeny a bydli w Boranecach pola Ra­dworja. Wón je jedyn z cyłkownje štyrjoch zajimcow, kotřiž běchu so na wupisanju gmejny k wobhospodarjenju šulskeje kuchnje požadali. Dotalnej wobhospodarjerce kuchnje běštej wupowědźiłoj.

Hančik je hižo nazhonity kuchar. Wuznawa so tež, wjetše kuchnje nawjedować a wobhospodarjeć. Přichodnemu nadawkej w Delanach je wón po wuprajenju zastupowaceho wjesnjanosty Michała Šołty derje zrosćeny. „Z rozsudom spokojom smy nětko wěsći, zo je zastaranje wšitkich tych, kotřiž su dotal wobjed z Ralbic dóstawali, dale zaručene“, Šołta widźomnje wolóženy rjekny. Wosebje wobdźělenych po wčerawšim rozsudźe spokoja, zo budźe wobjed nadal wšědnje čerstwy warjeny. Hladajo na pochad a nazhonitosć kucharja liča z wotměnjawymi a přiwšěm tež dale słódnymi jědźemi.

Póndźelu a wutoru wječor bě zhromadny gremij tych, kotřiž maja na zastaranju z wobjedom ze šulskeje kuchnje w Ralbicach zajim, z poslednimaj zajimcomaj rozmołwy wjedł. Kondicije a koncept knjeza Hančika su jich přeswědčili, a nětko móža wšitko trěbne přihotować. Mjez hodami a Nowym lětom chce gmejna socialne rumnosće w kuchni tak ponowić, zo budźe wot prěnjeho šul­skeho dnja noweho lěta wšědny wobjed zaručeny. Dalše dźěła delanska gmejna w zymskich prózdninach přewjedźe. Potom hišće trěbne ponowjenje rumnosćow kuchnje kaž tež jědźernje ma so w běhu přichodneho lěta zwoprawdźić. Wšitko stanje so krok po kroku při běžnym dźěle kuchnje hač do kónca lěta 2018. Njebudźe-li twarskich dźěłow dla warić na městnje nachwilnje móžno, chcedźa sčasom reagować a přechodne rozrisanje nańć, bjez toho zo wobjed na kwaliće poćerpi.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND