Róžant (jh/SN). Hońtwjerskej drustwje Róžant a Pěskecy stej prěnju sobotu noweho lěta zhromadnje z wotnarjerjomaj tamnišich lěsow Michałom a Janom Šołtu z Drježdźan tradicionelnu nowolětnu hońtwu přewjedłoj. W zasněženej krajinje a při temperaturach daloko pod nulu sćěhowaše přeprošenje wjace hač 40 honjerjow z Pěskec a Róžanta a runje telko spřećelenych hońtwjerjow.

Po tym zo běchu městna hajnikow rozdźělili a honjerjow zapokazali, prěnja dźiwina hižo do směra na Łazk abo Smječkecy ćěkaše, wuchowajo sej tak hišće žiwjenje. W běhu połdrahodźinskeje hońtwy pak běchu wjacore wutřěle słyšeć a honjerjo widźachu zatřělenu dźiwinu na polu blisko Róžanta. To běchu změrowace signale a wolóžace wobrazy, wšako chcyše kóždy z wobdźělnikow po hońtwje znajmjeńša jedyn kruch zatřěleneje dźiwiny wobdźiwać.