Přirodoškitarjo w sněze na slědach wudry byli

póndźela, 09. januara 2017
artikl hódnoćić
(0 )
Katharina a Stefan Weclichec z Wotrowa staj wčera dopołdnja we Łazkowskim lěsu  za slědami wudry pytałoj a tajke tež našłoj Foto: Marian Wjeńka Katharina a Stefan Weclichec z Wotrowa staj wčera dopołdnja we Łazkowskim lěsu za slědami wudry pytałoj a tajke tež našłoj Foto: Marian Wjeńka

Wotrow/Łazk (SN/MWj). W Sakskej njejsu kónc tydźenja jenož ptački ličili, ale w Budyskim wokrjesu tohorunja wudry. Dokelž su spłóšiwe zwěrjata w nocy aktiwne, njemóžeš je prosće kaž ptački ličić, ale dyrbiš jich slědy namakać. A dokelž to w normalnym padźe jenož w sněze dźe, běchu čestnohamtscy přirodoškitarjo Budyskeho wokrjesa sobotu a njedźelu namołwjeni na slědy wudrow so po­dać, mjez druhim podłu Klóšterskeje wody. Tak bě Kulowčan Bjarnat Domaška pola Koćiny po puću, Jaworčan Konrad Lipič w Lipju w Pančicach-Kukowje a dalši na druhich městnach. Wotrowčan Stefan Weclich a jeho mandźelska Katharina staj so wčera dopołdnja po Łazkowskim lěsu rozhladowałoj.

Kónc 1980tych lět bě Stefan Weclich prěni raz wudry sobu ličił. Jeho mandźelska a Měrćin Langer staj hižo sobotu mjez Porchowom a Wotrowom po puću byłoj. Kilometry daloko podłu Klóšterskeje wody přez sněh brodźić njeje runjewon lochke pućowanje. We Łazkowskim lěsu staj tuž skerje na šćežkach wostałoj a wottam hladałoj, hač je wudra něhdźe slědy zawostajiła. Cyle optimalne wšak wjedro njebě. Sobotu wječor drje bě so trochu posněžiło, tak zo bychu slědy wudry derje spóznajomne być dyrbjeli, wčera dopołdnja pak wospjetny sněh slědy zdźěla zaso ­zawodźě. Přiwšěm staj Wotrowskaj přirodoškitarjej jasne slědy wudry našłoj. Rady pohibuje so wona pod mostami, hdźež čuje so škitana. Na runych a ­wutwarjenych wotrězkach Klóšterskeje wody pak wudra po wšěm zdaću tak rady njeje. Skerje lubuje rěki, hdźež so sekluja, hdźež skića ­korjenje a kerki při wodźe dobry schow. Tajke wotrězki namakaš wosrjedź ­Łaz­kowske­- ho niwoweho lěsa, ale tež mjez Kanecami a Swinjarnju, pola Wotrowa a dru­hdźe.

Swoje wobkedźbowanja zdźělitaj Stefan a Katharina Weclichec přichodne dny wobswětowemu zarjadej wokrjesa. Mjez druhim wonaj do kartow zapisataj, hdźe su slědy wudry namakałoj. Z tychle datow hodźi so wuličić, kelko wudrow we wěstej kónčinje mamy. A cyle připódla móžeštaj Wotrowčanaj swoje wužitne skutkowanje jako čestnohamtskaj přirodoškitarjej z přijomnym přirodnym dožiwjenjom zwjazać, hdyž mjenujcy sorny a liški po za­sněženych polach wobkedźbujetaj abo hdyž so nadobo šěra čapla cyle blisko do powětra pozběhnje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND