Žitnych wikow dla bydlenja přepytali

srjeda, 11. januara 2017
artikl hódnoćić
(0 )

Podawki 14. septembra kaž tež w nocy wot 1. na 2. nowember 2016 na Budyskich Žitnych wikach stejachu dźensa w fokusu Zhorjelskeje policajskeje direkcije a operatiwneho wotwobaranskeho centruma sakskeje policije.

Budyšin (SN/MWj). Zhromadna přepytowanska skupina „Platte“, wobstejaca ze zastojnikow Zhorjelskeje policajskeje direkcije a wotwobaranskeho centruma sakskeje policije je dźensa w Budyšinje, Wojerecach, Schönteichenje a Hnašecach wjacore bydlenja přepytała. Kaž w zhromadnym nowinskim wozjewjenju policajskeje direkcije a statneho rěčnistwa rěka, je tele naprawy Zhorjelske hamtske sudnistwo na namjet tamnišeho statneho rěčnistwa přikazało. „Naprawy stejachu w zwisku z přepytowanjom podawkow 14. septembra 2016 kaž tež w nocy wot 1. na 2. nowember w Budyskim nutřkownym měsće. Mjez druhim přepytu­jemy spjećowanja přećiwo policajskim zastojnikam a nuzowanja dla“, steji w nowinskim wozjewjenju.

Přepytali su dźensa bydlenja 18 podhladnych. Jedna so wo dwanaće požadarjow azyla w starobje 15 do 23 lět a wo šěsć němskich staćanow w starobje 17 do 38 lět. Zastojnicy sćazachu 34 mobilnych telefonow, pjeć kompjuterow, 42 wšelkich składowanskich medijow a wjacore dźěle drasty. Dale namakachu a sćazachu dwě trašawce, softair-pistolu, zaražak, baseballowu palku, dwaj jako kapsna lampa tarnowanej elektrošokeraj, snadne mnóstwo drogow kaž tež nastrojej za jich wužiwanje. Při dźensnišim přepy­tanju by­dlenjow je zastojnikow přepy­towanskeje skupiny „Platte“ prezidij hotowostneje policije Sakskeje podpěrał. Dohromady bě na akciji něhdźe 130 policistow za­sadźenych, w nowinskej zdźělence dale pišu.

Přepytowanja Zhorjelskeho statneho rěčnistwa a skupiny „Platte“ dale traja. Dohromady wobdźěłuja kriminalisća tuchwilu 135 njeskutkow, kotrež su so wot 1. meje 2016 w Budyskim nutřkownym měsće, předewšěm na Žitnych wikach a wokoło tohole naměsta stali. Slědźenja měrja so přećiwo 88 podhladnym wosobam. Mjez nimi je 65 němskich staćanow a 23 wukrajnikow rozdźělnych narodnosćow.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND