W serbsko-arabskej barje swjećić

pjatk, 24. februara 2017
artikl hódnoćić
(0 )
W chěžce napřećo Kulowskej šuli su wčera nowu baru wotewrěli. Alf Layla Wa Layla, skrótka „Alf Layla“, ju mjenuja. Zajimcy móža ju tež jutře po póstniskim ćahu wopytać, wšako zaklinči tam mjez druhim serbska hudźba. Foto:  Bernadet Langec W chěžce napřećo Kulowskej šuli su wčera nowu baru wotewrěli. Alf Layla Wa Layla, skrótka „Alf Layla“, ju mjenuja. Zajimcy móža ju tež jutře po póstniskim ćahu wopytać, wšako zaklinči tam mjez druhim serbska hudźba. Foto: Bernadet Langec

Dožiwimy na póstnicach w Kulowje serbsku baru? A zasłyšimy po žonjacym karnewalowym ćahu sobotu a róžowu póndźelu našu maćeršćinu? Na kóždy pad: Tuž do Kulowa!

Kulow (bl/SN). Hač we wulkej bróžni, w přetwarjenej garaži abo na starej žurli – we wšěch kutach Kulowa so šrubuje, moluje a pasli. Witać chcedźa póstniski kónc tydźenja a hač do přichodneje wutory zaso tysacy hosći, kotřiž w njeličomnych mjeńšich a wjetšich barach hejsuja.

W małej chěžce napřećo šuli su wčera nowu baru wotewrěli. „Alf Layla Wa Layla“, skrótka „Alf Layla“, ju mjenuja. To je arabsce a woznamjenja tysac a jedna nóc. A prawdźepodobnje čuješ so w barje kaž w tysac a jednej nocy. Hižo wonkowny napohlad na zachod wuprudźa arabske wjeselo. Filigrane ornamenty, lětace přestrjency a kamelowe hłowy sćěny debja. Nad rejowanišćom je baldachin ze złoteje folije. Wjacore zawěški a indirektna swěca ambiente skulojćeja. Za wšěmi idejemi a organizatoriskimi přihotami tči skupina młodostnych ze Salowa, Hózka, Kulowa a dalšich serbskich wsow, kotřiž­ so tam hižo dlěši čas wšědnje k rumowanju, šrubowanju, instalowanju a pyšenju zetkawaja.

Nimo krasneje pychi z arabskimi elementami čakaja hišće dalše překwapjenki na hosći. Tak su wosebite napoje arabsce pomjenowali a pisany potpurij arabskeje, serbskeje, němskeje kaž tež jendźelskeje hudźby zestajeli. Sobotu wjerća tačele serbska DJjowa dwójka Swjaty duch a Njepomuk. Wosebity highlight budźe rańše piwko njedźelu wot 10 hodź. ze serbskimi hudźbnikami, z točenym piwom­ a rjanolinkami-horjenošerkami. Serbski rozhłós k tomu live wusyła. Młodostni karnewalisća wšitkich hač do wutory rady witaja. Zajimcy móža baru tež sobotu a póndźelu po póstniskim ćahu wopytać a so na bjesadu w „Alf Layli“ podać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND