Wabja za 23. jutrowne wiki

pjatk, 17. měrca 2017
artikl hódnoćić
(0 )
Jutrownej zaječkaj běštej minjene dny hižo we Wojerecach po puću, hdźež stej na jutrowne wiki za tydźeń we Łužiskej hali skedźbnjałoj.  Foto: Mandy Fürst Jutrownej zaječkaj běštej minjene dny hižo we Wojerecach po puću, hdźež stej na jutrowne wiki za tydźeń we Łužiskej hali skedźbnjałoj. Foto: Mandy Fürst

Wojerecy (MFü/SN). Dypkownje k zazběhej nalěća a k spočatkej lětnjeho časa přewjedźe Wojerowska Łužiska hala za tydźeń mjeztym hižo 23. jutrowne wiki. 25. a 26. měrca móža so wopytowarjo we wšelakich wobłukach Łužiskeje hale při stejnišćach 80 wikowarjow a rjemjeslnikow na jutry nastajić, dariki abo dekoracije kupić abo je sami paslić.

22 debjerjow jutrownych jejkow demonstruje swoje kmanosće, ale tež hornčerjo, škleńčerjo, kobjelerjo a módroćišćerjo chcedźa tam swoje wudźěłki poskićić. Mnohe wobliča budu wopytowarjam ze zašłych lět znate, někotre pak budu nowe, kaž te złotnikarskeje mišterki Sabriny Lakisoveje z Berlina. Wo kulturne wobrubjenje na jewišću staraja so regionalne wuměłske a ludowuměłske ansamble. Krabatowa drastowa skupina (sobotu w 16 hodź.), rejwanska skupina Wojerowskeho karnewaloweho kluba (njedźelu w 14 hodź.) a Brětnjanska drastowa­ a rejwanska skupina (njedźelu w 16 hodź.) předstaja žiwjenje, dźěło a swjedźenje­ serbskich wobydlerjow Wojerowskeho regiona.

Kreatiwni wopytowarjo móža jutrowne figury z drjewa a keramiki po swójskich předstawach pomolować. Na najmłódšich hosći čakaja zwěrjata k majkanju kaž tež móžnosće paslenja a hrajkanja. Wo hudźbnu zabawu postara so sobotu w 10.30 hodź. hrajny ćah Choćebuske hudźbne wrobliki. Njedźelu w 11 hodź. přeprosy Roland Bartko ze swojimi Grodkowskimi hercami na rańše piwko. A jako finale w 16.30 hodź. móža sej potom předewšěm dźěći słódčizny z wulkeje jutrowneje pyramidy wottorhnyć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND