Wojerecy (MFü/SN). Dypkownje k zazběhej nalěća a k spočatkej lětnjeho časa přewjedźe Wojerowska Łužiska hala za tydźeń mjeztym hižo 23. jutrowne wiki. 25. a 26. měrca móža so wopytowarjo we wšelakich wobłukach Łužiskeje hale při stejnišćach 80 wikowarjow a rjemjeslnikow na jutry nastajić, dariki abo dekoracije kupić abo je sami paslić.

22 debjerjow jutrownych jejkow demonstruje swoje kmanosće, ale tež hornčerjo, škleńčerjo, kobjelerjo a módroćišćerjo chcedźa tam swoje wudźěłki poskićić. Mnohe wobliča budu wopytowarjam ze zašłych lět znate, někotre pak budu nowe, kaž te złotnikarskeje mišterki Sabriny Lakisoveje z Berlina. Wo kulturne wobrubjenje na jewišću staraja so regionalne wuměłske a ludowuměłske ansamble. Krabatowa drastowa skupina (sobotu w 16 hodź.), rejwanska skupina Wojerowskeho karnewaloweho kluba (njedźelu w 14 hodź.) a Brětnjanska drastowa­ a rejwanska skupina (njedźelu w 16 hodź.) předstaja žiwjenje, dźěło a swjedźenje­ serbskich wobydlerjow Wojerowskeho regiona.