Wikowarjo štwórtk na Žitnych wikach

štwórtk, 30. měrca 2017
artikl hódnoćić
(0 )

Z nowymi wustawkami chce město Budyšin swoje tydźenske wiki wožiwić. Nowosć je, zo přewjedu wiki sadu a zeleniny přichodnje štwórtk na Žitnych wikach. Planowane su w sprjewinym měsće tohorunja jutrowne wiki.

Budyšin (CK/SN). Zeleny štwórtk budu tak mjenowane zelene a měšane wiki w Budyšinje prěni raz na Žitnych wikach. To je měšćanska rada wčera rozsudźiła a tak lěta trajace prócowanja wo přepołoženje městnosće skónčiła.

Wiki pod Bohatej wěžu běchu sej předewšěm starši wobydlerjo přeli, dokelž jim historiske plesternaki před a za radnicu ćeže načinjeja. W škałbach mjez kamjenjemi je něchtóžkuli z rolatorom tčacy­ wostał a młode žony ze swojimi wysokimi črijemi. Wikowarjo nadźijeja so wjetšeho wobrota, dokelž so na Žitnych wikach wjacore puće pěškow křižuja. Nimo toho tule hłowny puć ze Zhorjelca do Drježdźan nimo wjedźe. Tak budu tež ći wopytowarjo města, kotřiž chcedźa do Centera na Žitnych wikach, na tydźenske wiki skedźbnjeni.

Najwažniši argument přećiwo přepołoženju bě minjene lěta rozsudny. „Wot wikow na Hłownym torhošću a na Mjasowych wikach nadźijachmy so efektow za stare město“, rjekny Matthias Almert. Wotrjadnik w měšćanskim porjadniskim zarjedźe so boji, zo na Žitnych wikach wšitcy wikowarjo městno njezměja, dokelž je naměsto mjeńše. Njejasne je, kak so wuskutkuje, hdyž tam wobstajnje awta nimo jězdźa. W zašłosći su so chódnikowe platy časćišo zběhali. Tohodla so wiki najprjedy raz jeno štwórtk na Žitnych wikach wotměja, wutoru a sobotu dale na Hłownym torhošću. Wiki změja jednotne časy: Štwórtk hač do 17 hodź., tamnej dnjej hač do 13 hodź. Jutrowne wiki ćichu sobotu budu hač do 16 hodź. wotewrjene. Před lětomaj běchu je na iniciatiwu turistiskeho towarstwa prěni raz přewjedli a na to wobchowali.

Z nowymi wustawkami so tež popłatk wikowarjow změni. Woni wotnětka štwórtk 47 centow mjenje na kwadratny meter płaća, na tamnymaj dnjomaj 16 centow mjenje. Do intensiwnych přihotow za nowe wustawki běchu wikowarjo sobu zapřijeći, štož měšćanscy radźićeljo wčera wuraznje chwalachu.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND