Dwurěčne gmejny najwěsćiše

pjatk, 07. apryla 2017
artikl hódnoćić
(0 )

Ličba njeskutkow woteběra – pokradnjene kolesa a awta dale problem

Budyšin/Zhorjelc (SN/MWj). W Bóščanskej, Worklečanskej a Chróšćanskej gmejnje je so loni po wšej Zhorjelskej policajskej direkciji najmjenje kriminelnych deliktow­ stało. Tole wuchadźa z wčera wozjewjeneje statistiki policajskeje direkcije. Trend minjenych lět tuž wostawa, zo su dwurěčne gmejny mjez Budyšinom a Zhorjelcom sobu najwěsćiše cyłeje wuchodneje Sakskeje. Zwěsćić tole móžachu, přeličiwši mnóstwo njeskutkow na 100 000 wobydlerjow. Tale cyfra častoty wučinja za Zhorjelc wjace hač 15 000, za Bóšicy pak 853, za Worklecy 997 a za Chrósćicy 1 082.

Dohromady zličichu loni w Budyskim a Zhorjelskim wokrjesu wjace hač 36 500 njeskutkow, tak mało kaž zańdźene dźesać lět nic. Wjace hač třećina toho běchu padustwa. Wulki podźěl ­na tym ma tak mjenowana wobstaranska kriminalita, potajkim pady, w kotrychž skućićeljo kradnu, zo bychu sej swój wšědny dźeń abo tež wotwisnosć wot drogow a alkohola financowali. Při něhdźe kóždym sedmym padustwje su skućićeljo koleso kradnyli. „Druhdy wšak maja sej paduši lochko, dokelž ­wobsedźerjo swoje koleso w dosahacej měrje njezamkaja“, praji k tomu šef Zhorjelskeje policajskeje direkcije Conny Stiehl.

Dalše ćežišćo su kradnjene awta. Jich ličba wučinješe loni we woběmaj wo­krjesomaj 409, sto mjenje hač w lěće 2015. K tomu přińdźe nimale 200 padow, w kotrychž je pospyt, awto kradnyć, zwrěšćił. Najwjace tychle jězdźidłow bu w Zhorjelcu a w Žitawje kradnjenych. Ale tež we Wojerecach, w Budyšinje a Běłej Wodźe je policija wěstu koncentraciju tejele družiny deliktow zwěsćiła.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND