Dobre městno sporta a kultury

srjeda, 26. apryla 2017
artikl hódnoćić
(0 )
Dwaceći lět słuša sportowa a wjacezaměrowa hala „Slavia“ mjeztym do wjesneho napohlada Radworja. Wona słuži hłownje šulskemu  a towarstwowemu sportej, ale tež wjetše zarjadowanja tam přewjeduja.  Foto: SN/Maćij Bulank Dwaceći lět słuša sportowa a wjacezaměrowa hala „Slavia“ mjeztym do wjesneho napohlada Radworja. Wona słuži hłownje šulskemu a towarstwowemu sportej, ale tež wjetše zarjadowanja tam přewjeduja. Foto: SN/Maćij Bulank

Před 20 lětami sportowu a wjacezaměrowu halu „Slavia“ přepodali

Radwor (SN/MWj). Kak spěšnje čas postupuje, wuwědomjeja sej tele dny wobydlerjo Radworja. Dźensa je tomu dokładnje 20 lět, zo su tam sportowu a wjacezamě­rowu halu „Slavia“ oficialnje přepodali. Wužiwali běchu ju šulerjo Radworskeju šulow hižo tydźenje do toho, zo móhli w njej program za pře­podaće nazwučować.

Tehdy bě so Radworčanam dawny són spjelnił, přetož staru sportownju pódla hrodu sy lědma tajku mjenować móhł. Spjelniła je so tohorunja nadźija, zo nowa hala jeno šulskemu sportej njesłuži, ale tež najwšelakorišim sportowym a kulturnym zarjadowanjam. Tak pře­wjeduja w „Slaviji“ sokołske volleyballowe turněry a kóždolětny Mikławšowy koparski turněr runje tak kaž dwulětne adwentne wiki Radworskeju šulow, ptačokwasne zarjadowanja Serbskeho ludoweho ansambla a dalše po­dawki. Dale wotměchu tam sakske mišterstwa zbrašenych blidotenistow, sakske mišterstwa w tekwando a judo kaž tež podobne sportowe eventy, kotrež hranicy Radworskeje gme­jny přesahachu.

Tež Radworski wjesnjanosta Wincenc Baberška (CDU) ma dotalne wuwiće za spomóžne­. Wón dźě měješe tehdy sobu­ najwjetšu zasłužbu na tym, zo nowa­ hala nastanje. „,Slavia‘ bě 1997 najwjetše­ infrastrukturne přeće woby­dlerjow. Bjez njeje njeby Radwor jako šulska­ městnosć dale wobstał, dokelž sportowa wučba w starej hali zaručena njebě“, wjesnjanosta wuswětla. Zo móžachu ju twarić, bě jeno ze spěchowan­skimi srědkami móžno­. W tym zwisku mjenuje Baberška zapósłanca Sakskeho krajneho sejma Marka Šimana (CDU), kiž měješe tehdy wosebje wulke zasłužby na nastaću „Slavije“. Dźensa je Ra­dworski wjesnjanosta z jeje wućeženjom jara spokojom. Maja dźě tam lědma hišće swobodne terminy za towarstwowy sport, z kotrymž je hala po 40 procentach wućežena. Tamne 60 procentach wužiwaja za šulski sport. To jeničke, štož by sej Wincenc Baberška přał, je něšto wjace kulturnych zarjadowanjow. Wěsty zadźěwk při tym su pobrachowace blida a stólcy.

W rozprawnistwje wo „Slaviji“ před lětdźesatkomaj pak njeje so jewiło, kak je wona poprawom k swojemu mjenu přišła.­ ­Tehdy běchu wobydlerjo namołwjeni namjety zapodać, a wjacori swoju ideju předpołožichu. Tehdyši gmejnscy radźićeljo rozsudźichu so za namjet Mariana­ Wjeńki „Sportowa a wjaceza­měrowa hala Slavia“. Na te wašnje wotbłyšćowachu so w mjenje wuznamne stawizny Radworja na polu sporta, hdźež bě towarstwo Slavia w 1920tych lětach wažnu rólu hrało.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND