Tež maćerje w narodnej drasće byli

póndźela, 29. meje 2017
artikl hódnoćić
(0 )
Matej Kober bě sobotu na mejemjetanju w Sernjanach najspěšniši při wjeršku meje a wuzwoli sej  Saruh Obstec za swoju mejsku kralownu. Hromadźe z tamnymi porami  ćehnještaj wonaj na swjedźenišćo.  Foto: Alfons Handrik Matej Kober bě sobotu na mejemjetanju w Sernjanach najspěšniši při wjeršku meje a wuzwoli sej Saruh Obstec za swoju mejsku kralownu. Hromadźe z tamnymi porami ćehnještaj wonaj na swjedźenišćo. Foto: Alfons Handrik

Dlěši čas njeběchu w Sernjanach nałožk stajenja a mjetanja meje hajili, doniž njejsu so před lětomaj někotre tamniše młode serbske swójby wo wozrodźenje starali.

Sernjany (aha/SN). Termin mejemjetanja wučinichu sej na sobotu po Božim spěću. Minjenu sobotu mjeztym třeći raz su wjacore młode maćerje swoje dźěći narodnu drastu zhotowali. Krasny bě to Sernjančanam napohlad, hdyž poda so dźesać porow zaso pod hudźbnym přewodom Měrćina Weclicha na nawjes před hosćencom. Najmłódša w narodnej drasće bě hakle dwulětna Pia Hebestreitec ze swojim wo lěto staršim přewodnikom Lucom Haufu.

Prjedy hač meja padny, předstajichu wšitke pory zhromadnje – tež někotre maćerje běchu so narodnu drastu woblekli – spodobny program z tradicional­nymi rejemi a žnějachu mjez wjesnymi připosłucharjemi wulke připóznaće, jako předstajichu mjez druhim Šewca, Katyržinku a Stup dale. Po tym zo bě 22 metrow­ wysoki mejski štom padnył, docpě­ sydomlětny Matej Kober jako prěni­ jeho wjeršk ze serbskej chorhoju. Za mejsku kralownu wuzwoli sej wón šěsćlětnu ­Saruh Obstec.

Serbske ludowe pěsnje spěwajo poda so rjany ćah na swjedźensku łuku na kromje wsy. Byrnjež hač do dnja dźěsća přichodny štwórtk hišće trochu chwile było, postara so tam wjesny klub wo rjany dźěćacy swjedźeń ze skakanskim hrodom, plackowym mužom, wšelakorymi hrami a dalšimi poskitkami. Wšitkim Sernjančanam a jich hosćom bě to poradźeny swjedźeń při kofeju, tykancu a lóštnej bjesadźe.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND