Dobru zhromadnosć hajili

póndźela, 29. meje 2017
artikl hódnoćić
(0 )
Digitalny spěwnik měješe wjetšina młodostnych na swojim smartphonje a móžeše tuž sobotu w Jaseńcy mócnje sobu spěwać.  Foto: Bianka Wjeńcyna Digitalny spěwnik měješe wjetšina młodostnych na swojim smartphonje a móžeše tuž sobotu w Jaseńcy mócnje sobu spěwać. Foto: Bianka Wjeńcyna

Skupina Serbska murja zabawny spěwny wječor organizowała

Jaseńca (BW/SN). Młódne hłosy serbskich holcow a hólcow běchu sobotu wječor z Jasčanskeho kulturneho domu „Bjesada“ słyšeć. Tam bě skupina Serbska murja na zabawny spěwny wječor přeprosyła. Něhdźe połsta młodostnych z Pančic-Kukowa, Chrósćic, Noweje Wjeski a mnohich druhich kónčin bě přišło, tak zo je so tele wočakowanje spjelniło, rjekny­ jedyn z hłownych organizatorow Pětr Dźisławk z Chasowa.

Po hudźbnym wječoru kónc apryla w Budyskim Kamjentnym domje bě spěwny wječor druhe wot Serbskeje murje organizowane zarjadowanje, kotrež pak so tónraz hłownje na serbskich młodostnych měrješe. „My wšitcy rady serbsce spěwamy a tohodla smy so za tajkile wječor rozsudźili. Při tym hajimy tež dobru­ zhromadnosć“, praji Pětr Dźisławk k pozadkam. Serbske ludowe pěsnje a nowše spěwy přewodźeštaj Michał Donat­ na keyboardźe a Janek Süß na kachonje (bubon). Jeju podpěraštaj z městnami Roman Wjesela na trompeće a Kira Hrjehorjec na saksofonje. Spěwali su młodostni ze spěwnika, kotryž běchu čłonojo Serbskeje murje zestajeli. Do njeho zapřijachu nimale 70 serbskich, němskich a jendźelskich spěwow. Mjez nimi su tři, kotrež zawčerawšim takrjec prapremjernje zaklinčachu. Teksty Pětra Dźisławka na melodije Michała­ Donata jednaja wo tym, zo so serbski pachoł za serbsku holcu rozsudźi, wo wódnym mužu kaž tež wo dumpańcy pola Žurec.

Přewšo zajimawe bě sobotu wobkedźbować, zo młodostni teksty spěwow zwjetša z pomocu swojeho smartphona čitachu a mócnje sobu spěwachu. Serbska murja dźě bě na swojej Facebookowej stronje link k spěwnikej wozjewiła, tak zo móžeše sej jón kóždy na swój telefon sćahnyć. Na te wašnje so wotbłyšćowaše, zo wužiwaja serbscy młodostni dźens­niše moderne techniske móžnosće tež za skerje tradicionalne zarjadowanje kaž spěwny wječor.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND