Katastrofa a jeje konsekwency

wutora, 30. meje 2017
artikl hódnoćić
(0 )
Jedyn z eksemplarow brošurki přepoda Torsten Richter-Zippack (naprawo) bywšemu Běłowodźanskemu krajnemu radźe Erichej Schulzy.  Foto: Andreas Kirschke Jedyn z eksemplarow brošurki přepoda Torsten Richter-Zippack (naprawo) bywšemu Běłowodźanskemu krajnemu radźe Erichej Schulzy. Foto: Andreas Kirschke

Běła Woda (AK/SN). Lěsny woheń w meji 1992 pola Běłeje Wody bě jedna z naj­zahubnišich katastrofow zašłych lět­dźesatkow we Łužicy. Tole podšmórny lěsnik a žurnalist Torsten Richter-Zippack z Wjelceje na njedawnym předstajenju swojeje 48stronskeje brošurki „Lěsny woheń – Katastrofa – Běła Woda 1992“. „Płomjenja zničichu tehdy dohromady 920 hektarow lěsa. Sčasami bě murja wohenja­ hač do wosom kilometrow dołha“,­ wón rozłoži. Dokładnje 1 034 wohnjowych wobornikow ze 198 jězdźidłami z cyłeje Němskeje je přećiwo płomjenjam wojowało. Jedyn wobornik při tym­ žiwjenje přisadźi.

Za swoju brošurku je Torsten Richter-Zippack tehdyše rozprawy, stejišća, nowinske wozjewjenja a protokole wuhódnoćił. Tehdy zasadźenych wobornikow a časowych swědkow prašeše so wón za přičinami wohenja a za konsekwencami. „Jedyn wuslědk tehdy bě, wutworić Bě­łowodźansku wuchowansku dispatchernju. Nimo toho wutworichu wosebitu skupinu wobornikow z pjeć tankowymi jězdźidłami za lěsne wohenje. Dale polěpši so škričkowanska technika“, praji Gerd Preußing, šef Běłowodźanskeje wohnjoweje wobory. Horst Gramß bě 1992 jako jedyn z prěnich woheń wuhladał. Při předstajenju brošurki wón namołwješe, zo měli ratarjo runje tak wusko z wobornikami hromadźe dźěłać kaž Hamorska milinarnja a koncern LEAG. „Při lěsnym wohenju je prěnje zasadźenje najwažniše. Tu dyrbi so moderna technika zasadźeć“, Gramß rjekny.

Běłowodźanska měšćanska rada chce nazymu wohnjowoborny plan wobzamknyć. Wyši měšćanosta Torsten Pötzsch (Klartext) nadźija so dobrych rozsudow za přichod. Lěta 1992 měješe město Běła Woda 15 hłownohamtskich wobornikow, dźensa je jich hišće wosom. „Poslednje škrički wohenja w meji 1992 běchu hakle pózdnju nazymu zhašeli. Měsacy dołho je so podzemsce dale paliło“, zjima Torsten Richter-Zippack. „Dźensniša technika spožča nam jenož pozdatnu wěstotu. Lěsny woheń kaž te­hdy móže kóždy čas znowa wudyrić.“

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND